ოზურგეთის მუნიციპალიტეტის სოფელ მელექედურში ადგილობრივები დღეს დილიდან სასწაულის მომსწრეები გახდნენ.
სოფლის ტაძარში დილით წირვა უნდა ჩატარებულიყო, თუმცა დღეს სამღვდელოება ოზურგეთის საკათედრო ტაძარში შემოქმედის ეპარქიის ინიციატივითა და მიტროპოლიტ იოსების ლოცვა-კურთხევით, წმინდა ფილიმონ ქორიძის ხსენების დღეს აღნიშნავს და მამა ნიკოლოზიც იქ ბრძანდებოდა.
წირვის მომლოდინე მრევლმა გუმბათზე მაცხოვრის გამოსახულება შეამჩნია. ეს ყველაფერი ფოტოზეც არის აღბეჭდილი. როგორც ადგილზე მოგვიანებით მისული თვითმხილველები გვიყვებიან, დაუსრულებელი ტაძრის გუმბათზე, ნათლად არის გამოსახული მაცხოვარი, მის ხელებთან ტაძარი დასრულებული სახით ჩანს, თავზე კი ანგელოზის გამოსახულება იკვეთება.
ადგილზე, სასულიერო პირებიც იმყოფებიან, რომლებიც ნანახს ღვთიურ სასწაულს და კარგის მომასწავებელ გამოცხადებას უწოდებენ. ოზურგეთის საკათედრო ტაძრის დეკანოზი მამა ერმოლოუსი, რომელიც ადგილზე იმყოფებოდა, “გურიის მოამბესთან” საუბარში მომხდარს აფასებს.
“ყოველთვის, როცა ადამიანს სასწაულთან აქვს საქმე, ყოველთვის ფიქრობს, რისი მომასწავებელია ეს. მე, თქვენ და მთელს საქართველოს უნდა, რომ ეს იყოს კარგის მომასწავებელი და უფლის ლოცვით, ასეც მოხდება.
ტაძრის გუმბათზე გამოსახული მაცხოვრის მირქმის ხატის გამოსახვა ნიშნავს იმას, რომ მთელი სოფელი უნდა დაირაზმოს, და დაასრულოს ამ ტაძრის მშენებლობა. აქ ადრეც იყო ტაძარი, რომელიც იმ ავბედითი კომუნისტების დროს დაანგრიეს.
საერთოდ, ტაძრის მშენებლობა ყველაზე დიდი და უმნიშვნელოვანესი საქმეა. ეს ყველამ ერთად უნდა გააკეთოს და სარკმლის გაჭრა დროზე უნდა დასრულდეს”- ამბობს მამაომ.
ცნობისთვის, სოფელში ტაძრის მშენებლობა რამდენიმე წელია მიმდინარეობს და მისი დასრულება სხვადსხვა მიზეზების გამო ვერ მოხერდა. იოანე ნათლისმცემლის სახელზე მშენებარე ტაძარი, ძველი ეკლესიის საძირკველზე შენდება, რომელიც კომუნისტების დროს დაანგრიეს.
გთხოვთ გააზიარეთ სტატია.
თეა იოსელიანი, გურია
