საშობაო საჩუქარი, რომელიც თინა და ბენჯამენ გიბსონებმა მიიღეს, არასოდეს დაავიწყდებათ – მრავალწლიანი ბრძოლის შემდეგ უშვილო ცოლ-ქმარს პატარა ემა შეეძინა. ბავშვის ემბრიონი 24 წლის წინათ ჩაისახა, რაც დღეისთვის აბსოლუტური რეკორდია.
სანამ თინას სხეულში აღმოჩნდებოდა, ემბრიონი მეოთხედი საუკუნის მანძილზე გაყინული იყო. ამგვარად, დედა საკუთარ ქალიშვილზე მხოლოდ ერთი წლით უფროსია.
„ჩვენ შეიძლებოდა ერთმანეთი კოლეჯში გაგვეცნო და მეგობრები გავმხდარიყავით, თუმცა ახლა დედა-შვილი ვართ. განსაკუთრებული ბავშვი იმიტომ არ გამიჩენია, რომ რეკორდი მომეხსნა.
უბრალოდ, მე და ჩემს ქმარს საკუთარი შვილი ძალიან გვინდოდა“, – განაცხადა თინა გიბსონმა ინტერვიუში.
აღსანიშნავია, რომ უამრავი გაყინული ემბრიონი წლობით ელის დროს, როცა დედის სხეულში აღმოჩნდება და ქვეყანას მოევლინება.
დღეისთვის ემბრიონის 24-წლიანი ლოდინი მაქსიმალური მაჩვენებელი გახლავთ. რამდენიმე წლის წინათ ქვეყანას 20 წლის წინათ გაყინული ემბრიონიდან შობილი ბავშვი მოევლინა.
სამედიცინო ცენტრის ხელმძღვანელი, სადაც ოპერაცია ჩატარდა, ამბობს, რომ ორივე გადარჩენილი ემბრიონი ერთსა და იმავე დონორს ეკუთვნის, რაც უნიკალური შემთხვევაა, რადგან შემთხვევათა 75%-ში ემბრიონი იღუპება.
თინასა და ბენჯამენის შვილის, ემას ემბრიონი 1992 წლის 14 ოქტომბერს გაყინეს. გოგონა სრულიად ჯანმრთელი დაიბადა, რაც მშობლებისთვის ყველაზე სასიხარულოა.
ემას მამა, ბენჯამენი 33 წლისაა. მიუხედავად იმისა, რომ ის ბიოლოგიური მშობელი არ გახლავთ, ამტკიცებს, რომ დანახვისთანავე, გოგონა ღვიძლი შვილივით შეიყვარა.
ექიმების თქმით, ბენჯამენს საკუთარი შვილის ყოლა არ შეუძლია.
წყვილი უკვე ბავშვის აყვანაზე ფიქრობდა, როცა ალტერნატიული დაფეხმძიმების მეთოდების შესახებ გაიგეს და გადაწყვიტეს, რომ მათთვის ეს იდეალური ვარიანტი იქნებოდა, რადგან ფეხმძიმობიდან დაწყებული, ჩვილის დაბადებით დამთავრებული, ყველა ეტაპს ერთად გაივლიდნენ.
მიუხედავად იმისა, რომ უკვე საკუთარი შვილი ჰყავთ, ბენჯამინსა და თინას ბავშვის აყვანის იდეაზე უარი არ უთქვამთ.
გთხოვთ მოიწონეთ და გააზიარეთ სტატია.. ასევე გაგვიზიარეთ თქვენი აზრი კომენტარებში..
ყურადღება: ფოტო პირობითია
