ბარბარა სამხარაძე რუსთავი 2 ის გადაცემა ,,ნიჭიერის’’ გამარჯვებული 2016 წელს გახდა, მისი უნიკალური ხმის ტემბრი მსმენელისთვის მარტივად შესაყვარებელი და გამარჯვების მომტანი აღმოჩნდა. რამდენიმე წლის შემდეგ, კი, ბარბარას ახალი სიმღერა ,,Ocean Side’’ ჩნდება სოციალურ ქსელებში. ,,სიმღერა არ ყოფილა ჩაფიქრებული როგორც ,,კომერციული გათვლა’’ , ეს იყო სათქმელი და ეს იყო ჩემი შინაგანი სამყაროს გამოძახილი’’ – ამბობს ბარბარა სამხარაძე. სიმღერის დაწერის ისტორიას კი თავად უფრო უკეთ მოგვიყვება.
– რა გახდა შენი ინსპირაციის წყარო, რომ ეს სიმღერა შეგექმნა?
– პანდემიის პირობებში, საზოგადოების მენტალური ჯანმრთელობა საგრძნობლად შეიცვალა, გაგიკვირდებათ და გამონაკლისი არც მე ვიყავი. ეს სიმღერა ჩემს თავს დავუწერე, მინდოდა სათქმელი ყველაზე კარგად რაც გამომდის იმ გზით გადმომეცა.
– ,, ჩემი გონება ყვირის’’ – არის სიმღერის მთავარი სიტყვები, არის თუ არა ადამიანი(ადამიანები) ვისაც გაუგზავნე ეს შეტყობინება სიმღერის სახით?
– ამ შეტყობინების სამიზნე იყო ყველა, ვისაც ბარბარა უდარდელ და ლაღ ადამიანად მიაჩნია, არის რაღაც რასაც ვერავინ ხედავს და ამჩნევს, მაგრამ ამ დროს ადამიანი შინაგანად ინგრევა და თუნდაც მისი გონება ,, ყვირის ’’ .
-სიმღერის გამოსვლიდან დღემდე, ეს სიმღერა მილიონობით ადამიანმა მოისმინა, აიტაცა და იმდენად პოპულარული გახდა, რომ ყველა სოციალურ ქსელში შენ მიერ შესრულებულ სიმღერას გადაეყრები. როგორ ფიქრობ, რა გახდა ამის მიზეზი?
– სიმღერა არ ყოფილა ჩაფიქრებული, როგორც ,, კომერციული გათვლა’’ , ეს იყო სათქმელი და ეს იყო ჩემი შინაგანი სამყაროს გამოძახილი. ვფიქრობ, სწორედ ესაა ასეთი წარმატების მთავარი მიზეზი, ხალხმა ის იგრძნო რა განწყობითაც მე დავწერე.
– ელოდი თუ არა ამ შედეგს და ხალხის ასეთ დიდ დაფასებას?
– ნამდვილად მოულოდნელი იყო ამხელა გამოხმაურება ასე მოკლე დროში, იმ ყველაფრის გათვალისწინებით, რომ არავინ მყავდა ვინც ამ სიმღერას აქტიურად გადააზიარებდა და გარკვეულ ჯგუფებში გაავრცელებდა, მაგრამ როგორც ჩანს, როცა კარგს და ღირებულს ქმნი მაშინ არავინაა საჭირო და ყველაფერი შენს ხელშია.
– და ბოლოს, შენი აქტიური მსმენელი და გულშემატკივრები, უნდა ელოდნენ თუ არა შენგან კიდევ ახალ სიმღერებს, რადგან ასეთ დროს მსმენელი უფრო მეტს ითხოვს შენნაირი მუსიკოსისგან.
– მინდა გითხრა, რომ ძალიან ვნერვიულობ შემდეგ ნაბიჯებზე, რადგან, როდესაც ამხელა ინტერესი და წარმატება მოაქვს შენ ასეთ ნამუშევარს, ფაქტობრივად არ გაქვს უფლება შემდეგი წინაზე უარესი იყოს. ვნერვიულობ, მაგრამ ზუსტად ვიცი ყოველ ნაბიჯზე მსმენელი ჩემი განვითარების მოწმე იქნება.
ესაუბრა: გური ხუნაშვილი
