განათლების, მეცნიერებისა და ახალგაზრდობის სამინისტროს დაფინანსება პირველად პროექტთან შედარებით, 2026 წლის ბიუჯეტის საბოლოო ვარიანტში გაიზარდა, თითქმის, 90 მილიონი ლარით და 2 მილიარდ 700 მილიონ ლარს აჭარბებს.
ზოგადი განათლების დაფინანსებაზე დამატებით გამოიყო 37 მილიონ ლარზე მეტი და მისი მოცულობა 1 მილიარდ 923 მილიონ ლარს აღწევს. პროგრამის ფარგლებში გათვალისწინებულია საჯარო სკოლების ადმინისტრაციული პერსონალის, სკოლის ექიმებისა და მანდატურების ხელფასების 20%-იანი ზრდა, ნაცვლად მანამდე განსაზღვრული 10%-ისა;
პროფესიული განათლების ნაწილში, დამატებით გამოიყო 4 მილიონ ლარზე მეტი, ხოლო ინფრასტრუქტურის გაუმჯობესებისთვის 10 მილიონი ლარი, შესაბამისად პროგრამის ჯამური ბიუჯეტი 229 მილიონ ლარს აჭარბებს;
ინკლუზიური განათლების დაფინანსება, გაზრდილია 8 მილიონ 500 ათასი ლარით და 101 მილიონ ლარს აჭარბებს;
ახალგაზრდობის მხარდაჭერის პროგრამების დაფინანსება გაზრდილია, თითქმის, 6 მილიონი ლარით და 21 მილიონ 500 ათას ლარს აჭარბებს;
ინფრასტრუქტურის ნაწილში, დამატებით 4 მილიონი ლარია გამოყოფილი უმაღლეს სასწავლებლებში მცირე სარეაბილიტაციო სამუშაოებისთვის, ხოლო 18 მილიონი გამოიყო საჯარო სკოლების ინფრასტრუქტურისთვის.
ინფორმაციას ფინანსთა სამინისტრო ავრცელებს.
წყარო: პრაიმტაიმი
