ორთაჭალაში, დევნილთა საცხოვრებელ კორპუსში მომხდარი აფეთქების შედეგად 1 ადამიანი დაიღუპა.
გარდაცვლილი 70 წელს გადაცილებული მამაკაცია, რომლის სახლშიც აფეთქება მოხდა.
“12 საათს იყო გადაცილებული, როცა აფეთქების ხმა გაისმა. ჩავთვალე, რომ ფეიერვერკი იყო, დაემთხვა, რომ ძველით ახალ წელს აღნიშნავენ. დაშავებულებს რაც შეეხება, ბავშვი დაშავდა, წაიყვანეს კლინიკაში, ასევე ერთი მოქალაქე, რომელიც მდგმურად ცხოვრობდა აქ. გარდაცვლილია მამაკაცი, ვის სახლში აფეთქება მოხდა, ეზოში იპოვეს გარდაცვლილი, ალბათ ტალღამ გადმოაგდო. მარტო ცხოვრობდა სახლში” – უყვება ადგილობრივი ,,ფორმულას”.
აფეთქების შედეგად დაშავებული 4 პაციენტეიდან კლინიკაში 25 წლის ბიჭი რჩება. დაშავებულთა შორის არის 12 წლის ბავშვიც.
“კლინიკაში ამჟამად 25 წლის მამაკაცი რჩება, რომლის მდგომარეობაც საკმაოდ მძიმეა, აღენიშნება ღია ქალატვინისა და გულ-მკერდის დაზიანება. პაციენტი არის უგონო მდგომარეობაში, იმყოფება ინტენსიური თერაპიის განყოფილებაში და არის აპარატულ სუნთქვაზე.
ჩვენთან კლინიკაში ასევე კიდევ 2 პაციენტი იყო გადმოყვანილი, აქედან ერთი არის პედიატრიული ასაკის – 12 წლის. მოზარდი გარკვეული რეკომენდაციებით ბინაზე ეწერება. ერთმა პაციენტმა ღამის საათებში დატოვა კლინიკა, რომელსაც მსუბუქი დაზიანებები აღენიშნებოდა“,- აცხადებს კლინიკის ექიმი.
წყარო: ambebi.ge
