ჟურნალისტმა ნინო ხაჟომიამ, რომელიც ბოლო თვეების განმავლობაში მძიმე სენს ებრძვის, მკურნალობის ერთ-ერთი ყველაზე რთული ეტაპი დაასრულა. ქიმიოთერაპიის 12 რაუნდის შემდეგ, ნინო რეაბილიტაციის კურსის დაწყებას აცხადებს და საზოგადოებას უზიარებს, რომ ამ უჩვეულო და, ამავე დროს, შთამაგონებელ გზას ხელოვნური ინტელექტის მენტორობით გაივლის
ის თავის ემოციურ ვიდეომიმართვაში, რომელიც სოციალურ ქსელში გამოაქვეყნა, გულახდილად საუბრობს იმ მძიმე ფიზიკურ და ფსიქოლოგიურ კვალზე, რომელიც კიბოსთან ბრძოლამ და მკურნალობამ დატოვა.
“ეს მე არ ვარ, ეს არის ის, რაც კიბოს მერე დავრჩი. 12 რაუნდის ქიმიის შემდეგ დავრჩი ასე – უთმო, უწარბო, უწამწამო, ფიზიკურად და ფსიქოლოგიურად წაქცეული. დღეს არის ჩემი ბოლო ქიმია. დღეიდან იწყება აღდგენის ფაზა. ამ გზას მე გავივლი ხელოვნური ინტელექტის მენტორობით. ჰოდა, თუ თქვენც ამ გზას გადიხართ, მაშინ აუცილებლად გამომყევით ჩემს “ტიკ-ტოკ“ არხზე და ვნახოთ, რას შეძლებს ხელოვნური ინტელექტი და რამდენად სწრაფად, ხარისხიანად აღგვადგენს“, – ამბობს ნინო.
ნინო ხაჟომიას დიაგნოზი საზოგადოებისთვის ცნობილი მას შემდეგ გახდა, რაც ჟურნალისტმა სოციალურ ქსელში ემოციური სტატუსი გამოაქვეყნა და ღიად ისაუბრა კიბოსთან ჭიდილზე. მან აღნიშნა, რომ დაასრულა “გმირობა“ და დაიწყო “ნამდვილი სიცოცხლე“, მიმართა რა სიყვარული საკუთარი თავისკენ.
“ჯიუტად ძლიერი ქალი, უკიდეგანო გამძლეობით, აღმოვჩნდი ონკოლოგის კაბინეტში… დავასრულე გმირობა და დავიწყე ნამდვილი სიცოცხლე. იმიტომ, რომ ღირსი ვარ იმ სიყვარულის, რომელიც ბოლოს და ბოლოს საკუთარ თავზე მივმართე!!!“ჟურნალისტის თქმით, დაავადებამ აიძულა, გაეანალიზებინა და გადაეფასებინა ცხოვრებაში ყველაფერი: კარიერა, ურთიერთობები და საკუთარი თავისადმი დამოკიდებულება. მან ღიად ისაუბრა იმაზეც, რომ ემოციების ჩახშობა და მუდმივი სიმტკიცის დემონსტრირება ზიანს აყენებდა მის ფიზიკურ და ფსიქიკურ ჯანმრთელობას”.
ნინომ საჯაროდ აღიარა დიაგნოზი და აღნიშნა, რომ ამ აღიარებამ მას დამატებითი სტიმული მისცა ბრძოლისთვის. მკურნალობის პროცესში, მან პრევენციის მიზნით, ორივე მკერდის მოკვეთა გადაწყვიტა, რათა მომავალში რეციდივის შიშით არ ეცხოვრა.
წყარო: ambebi.ge
