ამბავი, რომელსაც ახლა მოგითხრობთ, დაუჯერებლად შეიძლება მოგეჩვენოთ. ამას წინათ წავიკითხე “გზავნილებში” მსგავსი ამბავი, მაგრამ ჩემი გაცილებით საინტერესო და დაუჯერებელი მგონია…
ზურა რომ გავიცანი, ისე მომეწონა, თავი დავკარგე. მაშინ ის 37 წლის იყო, – 14 წლით ჩემზე უფროსი, მაგრამ ასაკობრივ სხვაობას რას დავეძებდი… სამ-თვიანი ურთიერთობის შემდეგ სიყვარულში გამომიტყდა. უსაზღვროდ ბედნიერი ვიყავი.
ოჯახში მოვიდა და მამაჩემს სთხოვა ჩემი ხელი. ზურას მშობლები არ ჰყავდა, მისი ნათესავებიდან კი ძალიან ცოტანი იყვნენ ქორწილში.
ზურა იმდენად მიყვარდა, რომ თვალდახუჭული ვენდობოდი და რასაც მეუბნებოდა, ყველაფერი მჯეროდა.
ჩვენი 8-წლიანი ცოლქმრობის განმავლობაში სულ რამდენჯერმე შევხვდი ზურას ნათესავებს. ჩემს ქმარს ისინი გულზე არ ეხატებოდა.
გულდაწყვეტილი მიამბობდა – დეიდა მზრდიდა, სანამ მიჭირდა, არავის ვენაღვლებოდი, ფეხზე რომ დავდექი, მერე გავახსენდი ბევრს, ასეთი ნათესავი არ მჭირდებაო…
შვილები სკოლაში რომ მივიყვანე, მაშინ შევიტყვე, რომ ჩემს მეუღლეს სხვა ოჯახიც ჰქონია. მეგობარმა ამბავი მომიტანა, – შენს ქმარს ერთ ახალგაზრდა ქალთან და ორი წლის ბავშვთან ერთად ხშირად ვხედავო. ზურა ბოლო წლებში სხვა სამსახურში გადავიდა, ხშირად უწევდა მივლინებებში წასვლა.
ამიტომ შეგუებული ვიყავი, რომ შინ ღამე არ მოდიოდა… – ზურა და სხვა ქალი? – ვეკითხებოდი საკუთარ თავს, მაგრამ შინ დაბრუნებულ ქმარს არაფერი ვკითხე.
ესეც მეგობრის რჩევით გავაკეთე. მან მითხრა, – ტყუილუბრალოდ ნერვიულობასა და ჩხუბს, სჯობს თვალი მიადევნო და ფაქტზე გამოიჭიროო.
ასეც მოვიქეცი. როცა ზურამ მითხრა, – მივლინებაში მივდივარ ერთი კვირითო, გადავწყვიტე, შემემოწმებინა მისი სიმართლე. ჩემი მეგობრისგან დაახლოებით ვიცოდი იმ ახალგაზრდა ქალის მისამართი. მეგობარმა მანქანით მომაკითხა და დილიდანვე წავედით საეჭვო მიდამოების დასაზვერად.
პირველმა დღემ ისე ჩაიარა, “ეჭვმიტანილები” არ შეგვიმჩნევია, მეორე დღეს კი ზურა და ის ქალი შორიდანვე დავინახეთ და პატარა გოგონაც თან ახლდათ.
უკან გავყევით. ერთ დიდ სახლს მიადგნენ. უკვე ეჭვი აღარ მეპარებოდა, რომ ზურას საყვარელი ჰყავდა. მეგონა, რომ ბავშვიან ქალთან მღალატობდა, მაგრამ თურმე მთავარი ჯერ კიდევ წინ მქონდა…
როგორც მოგვიანებით გვიგე, ოქროყანის სახლი ქალის დედ-მამის ყოფილა. ერთადერთ შვილს მშობლებმა სამოთახიანი ბინაც აჩუქეს თბილისში.
ზურას და იმ ქალს კი ოფიციალურად ჰქონდათ ხელი მოწერილი. ამის მერე გავიგე, რომ ჩემამდეც ჰყოლია 2 ცოლი. 8 წელი ისე ვიცხოვრეთ ერთად, რომ ეჭვიც არაფერზე გამჩენია. პირველი ცოლი სოფელში ცხოვრობს. ის ქალი 18 წლისას შეურთავს.
მერე დაუკრავს ფეხი და კიევში წასულა. პირველთან არც განქორწინებულა, იქ მეორე ცოლი შეურთავს. უკრაინიდან ფულს უგზავნიდა პირველს, რომელსაც სჯეროდა, რომ ქმარი ოჯახის სარჩენად იყო უცხოეთში. რამდენიმე წლის შემდეგ უკრაინელიც მიატოვა.
თუმცა არც იმ ქალისთვის უთქვამს, გაგშორდიო. ეტყობა, საწყალს ჩემსავით არწმუნებდა, რამდენიმე წლით მივლინებაში გამიშვეს უცხოეთშიო… მოკლედ, ხან რას იგონებდა და ხან – რას… თან ძალიან კარგი და თბილი ადამიანია.
მექალთანე კაცების უმრავლესობა არ არის უხეში, პირიქით, მზრუნველია და ცდილობს, ცოლს ასიამოვნოს, საოჯახო საქმეში დაეხმაროს.
უდავოდ ნიჭიერი კაცი იყო (და არის კიდეც), ნებისმიერი საქმე, რასაც ხელს მოჰკიდებდა, ჩინებულად გამოსდიოდა. ქალები უყვარდა და ერთმანეთის მიყოლებით მოიყვანა ცოლები, თორემ არც ერთისთვის ყურადღება არ მოუკლია.
მისმა საქციელმა ისე გამამწარა, რომ ერთხანს შვილებს არ ვაჩვენებდი, არც მისი გამოგზავნილი ფული მინდოდა. მერე, შვილებმა მითხრეს, – ჩვენ გვიყვარს მამიკო და მასთან ურთიერთობას ნუ გვიშლიო.
რა უნდა მექნა? ახლა შვილებს ხშირად აკითხავს, ისინიც მიდიან მასთან, უმცროს დაიკოსაც ნახულობენ (მეოთხე ცოლთან რომ შეეძინა) და უფროს ძმასაც (პირველ ცოლთან შეძენილს). ზურამ მითხრა, თურმე პირველი ცოლი უფრო შეგნებული ყოფილა, რადგან განქორწინებაც არ მოუთხოვია.
მეოთხემ აპატია ყველაფერი და ერთად არიან, მაგრამ არა მგონია, ზურა მასთან სამუდამოდ დარჩეს. ჯერ კიდევ ახალგაზრდად თვლის თავს და ალბათ, მეხუთე ცოლსაც შეირთავს…
გთხოვთ მოიწონეთ და გააზიარეთ სტატია..ასევე გაგვიზიარეთ თქვენი აზრი კომენტარებში..
ყურადღება: ფოტო პირობითია
