ქართველი პიანისტი, 24 წლის დავით ხრიკული ვარშავაში ფრედერიკ შოპენის სახელობის რიგით მე-19 პიანისტთა საერთაშორისო კონკურსში მონაწილეობდა, რომელიც ხუთ წელიწადში ერთხელ იმართება. მიუხედავად იმისა, რომ დავით ხრიკულის ბრწყინვალე შესრულებას ყველა აღიარებდა, ჟიურის გადაწყვეტილების შედეგად, ყველანაირი საპრიზო ადგილისა და ჯილდოს გარეშე დატოვეს, რამაც მსმენელის დიდი პროტესტი გამოიწვია. სოლიდური ფულადი ჯილდო, 6 ათასი ევრო კი ქართველ პიანისტს კერძო პირმა გადასცა, რასაც დარბაზში მქუხარე ოვაციები მოჰყვა.
სოციალურ ქსელში საქართველოს მუსიკალური საზოგადოების წარმომადგენლებმა, უკლებლივ ყველამ, უკიდურესი აღშფოთება გამოხატა ჟიურის მიმართ.
ამ საკითხზე ნანი ბრეგვაძეს საუბრობს:
– რაც მოხდა, ეს იმდენად შემაძრწუნებელია, აღარც ვიცი, რა ვთქვა! ახლაც რომ ვლაპარაკობ, სიბრაზისგან მეტირება. გაოცებული ვარ, ვინ არიან ჟიურის შემადგენლობაში, ამდენად არაკეთილსინდისიერები, არა – მუსიკოსები… რაღაცის გამო ყველა პრიზს ჩინელებს აძლევენ, ლამის ყველა კონკურსი მათია.
ყველა გაოგნებულია ჟიურის გადაწყვეტილებით, მაგრამ ამ ოქროს ბიჭის, დავით ხრიკულის ნიჭი ხომ არ იკარგება?! ეს ჩვეულებრივ შემთხვევად უნდა ჩაითვალოს, მას თავისი ცხოვრებას აქვს და წინ უდიდესი წარმატებები ელის! მაყურებელი შეიშალა ჭკუიდან, ისეთი ამბავი იყო და ჟიურის მხრიდან ეს არის მსმენელის ძალიან დიდი უპატივცემულობა, საზოგადოების არაფრად ჩაგდება! ან გამოდის, რომ წარმოდგენაც არ აქვს, კარგი და ცუდი რა არის!
– დღეს ბევრ კონკურსზე შეინიშნება იგივე?
– საერთოდ, ძალიან არ მიყვარს კონკურსები, რადგან ხშირია ასეთი არაობიექტური გადაწყვეტილებები და ვიღაცას ვიღაც მფარველობს. მე რომ მკითხოთ, ძალიან დიდი შეურაცხყოფა მიაყენეს შოპენის კონკურსს, პოლონეთს! ამხელა უსამართლობის შემყურე, შეიძლება გაგიჟდე, საერთოდ, სხვა სამყაროში წახვიდე! ეგენი დიდხანს ვერ გაძლებენ. ვინც აღშფოთებულია, ყველამ უნდა დაწეროს და გამოხატოს თავისი აზრი.
მე მინდა დათუნა ხრიკულს მივმართო, რომ კონკურსი არაფერი არ არის! შენ ხომ შენი საქმე გააკეთე და ბოლოსდაბოლოს, მსმენელთან ერთად, თავადაც დიდი სიამოვნება მიიღე. ამ კონკურსში მეექვსე ხარ თუ მეასე, მაინც პირველი ხარ!
ძალიან ავღელდი, მაგრამ სხვანაირად არ შემეძლო. მეც კონსერვატორია დავამთავრე, ჩემი იქაური მეგობრები, ყველა ძალიან შეშფოთებულია და მადლობას გიხდით, რომ დამირეკეთ და ჩემი აზრით დაინტერესდით!
წყარო : today.com.ge (სპეციალურად საიტისთვის).
