მკვლელობის შესახებ, რომელიც შარშან ზაფხულს საბერძნეთში მოხდა, ახალი დეტალები ხდება ცნობილი.
ბერძნული მედიის ცნობით, გარდაცვლილი 20 წლის ქეროლაინ კრაუჩის მეუღლე, რომელიც გოგონას მკვლელობაშია ბრალდებული და უვადო პატიმრობა აქვს მისჯილი, აცხადებს, რომ ქართველებმა საპატიმროში მისი ლიკვიდაცია დაუკვეთეს და რამდენიმე თვის წინ, მუქარის შემცველი შეტყობინებაც მიიღო.
34 წლის კაცი ამტკიცებს, რომ თავისი თანაპატიმრებისგან შეიტყო, რომ „უზარმაზარ თანხას“ მისი სიცოცხლის სანაცვლოდ სთავაზობენ.
რამდენიმე დღის წინ, პილოტის ადვოკატმა, ალექსანდროს პაპაიოანიდისმა განაცხადა, ეჭვი არ ეპარება, რომ მისი კლიენტის სიცოცხლეს საფრთხე ემუქრება.
„ის ბევრად უფრო უსაფრთხო იქნებოდა კორიდალოსში“, – თქვა ადვოკატმა.
ბერძნული მედიის ცნობით, მსჯავრდებული მფრინავი მალანდრინოს ციხიდან კორიდალოს ციხეში გადაყვანას ითხოვს. ადვოკატმა ციხის ადმინისტრაციას წერილობით უკვე მიმართა.
ბერძნული მედიის ინფორმაციით, 20 წლის კაროლაინის მკვლელობისთვის დაკავებულმა ქმარმა მკვლელობის მოტივად ბოლო დროს, გახშირებული ოჯახური კონფლიქტები დაასახელა.
აღსანიშნავია, რომ თავდაპირველად, ახალგაზრდის მკვლელობა ქართველს ბრალდებოდა.
ცნობისთვის, მკვლელობა 2021 წლის მაისში, ათენის გარეუბანში მოხდა. თავდაპირველად დაკავებული იყო საქართველოს მოქალაქე, თუმცა, მოგვიანებით მისი მონაწილეობა დანაშაულში არ დადასტურდა.
გთხოვთ გაგვიზიარეთ თქვენი აზრი კომენტარებში…
