მოკლული მასწავლებლის, გიგა ავალიანის დედა, ეკა კუპატაძე TV პირველის ეთერში :
“მართლა გულწრფელად მიკვირს, ამას როგორ ითმენდნენ? ეს ხომ მთელმა დიდმა დიღომმა იცოდა? ხალხმა ხმა რატომ არ ამოიღო? არავინ რატომ არაფერი არ თქვა? ხო გადარჩებოდა ჩემი შვილი… ნამდვილად ვიტყვი იმას, რომ ჩემმა ყვირილმა, ჩემმა მართლა რკინის ქალობამ, როგორც ხალხი მიწერს, დიახ, სწორედ ამან დადო ის შედეგი, რომ ესენი გამოვლინდნენ და მე გადავარჩინე, ნამდვილად თამამად ვამბობ ამას, გადავარჩინე სხვისი შვილები. არავის ეგონოს, რომ ბრძოლა დამთავრდა… ხვალ შემაქვს სარჩელი ერთ-ერთი არასრულწლოვანის დედის წინააღმდეგ, ამისთვის მჭირდება დაზარალებულად ცნობის დადგენილება, 14 იანვარს დაზარალებულად მცნეს და არ წამიღია ეს ცნობა, დღეს სწორედ ამისთვის ვარ ახლა პროკურატურაში. დეტალებისგან თავს შევიკავებ, თუ ვისი დედაა და კონკრეტულად რა საქმეზე ვუჩივი, არასდროს არაფერზე შემიკავებია თავი, მაგრამ ახლა ვითვალისწინებ ჩემი ადვოკატის რჩევას, რომ ვიდრე საქმეს არ მივიყვანთ გარკვეულ ეტაპამდე, ეს არ ვთქვათ”
პროკურატურამ დღეს გიგა ავალიანის მკვლელობის საქმეზე დაკავებულებს ბრალი დაუმძიმა. ამასთან ერთად, ცნობილი გახდა, რომ დაკავებულები ძალადობის სხვა რამდენიმე ეპიზოდშიც მონაწილეობდნენ – ისინი წინასწარი ორგანიზებით, სხვადასხვა პირებზე ძალადობდნენ და აღნიშნულს მობილური ტელეფონების გამოყენებით იღებდნენ.
