მტკვრის მარცხენა სანაპიროზე, დაზიანებულ საგზაო მონაკვეთზე მოძრაობა მაისის ბოლოსთვის აღდგება. ამის შესახებ თბილისის მერმა კახა კალაძემ ისაუბრა, რომელმაც მიმდინარე სამუშაო პროცესი, მოადგილესთან ირაკლი ბენდელიანთან ერთად დაათვალიერა.
ცნობისთვის, მტკვრის მარცხენა სანაპიროზე, რესტორან „გაგრის“ მიმდებარედ გზის დაზიანებული მონაკვეთისა და საფეხმავლო ბილიკის გამაგრება მიმდინარეობს.
კახა კალაძემ მტკვარში განთავსებულ ლოდებზე გაამახვილა ყურადღება, რასაც სოციალურ ქსელში გამოხმაურება მოჰყვა – „ძალიან ბევრი მითქმა – მოთქმა იყო ქვებთან დაკავშირებით, სოციალურ მედიაში. ვიცით, ჩემო მეგობრებო, რომ ბევრი რამე იცით და ეს ძალიან კარგია, მივესალმებით, ამას მხოლოდ, მაგრამ რაღაცები ჩვენც ვიცით. ვიცით, როგორ უნდა იმოქმედოს შესაბამისმა სამსახურმა და რა უნდა გაკეთდეს ამ ტიპის პრობლემების დროს“.
აღნიშნულთან დაკავშირებით, ირაკლი ბენდელიანმა განმარტა, რომ ეს დროებითია და მხოლოდ წყლის ნაკადის მიმართულების შესაცვლელად გაკეთდა.
„რა თქმა უნდა, ეს არის დროებითი. ეს ლოდები შემოვიტანეთ იმისთვის, რომ წყლის მიმართულება შეგვეცვალა. რეალურად, ახლა სადაც ვდგავართ, პირველ დღეს აქ მტკვარი მოედინებოდა. შესაბამისად, ჩვენ ეს რომ არ გაგვეკეთებინა, მტკვრის დონეს ვერ შევწევდით, მიმართულებას ვერ შევუცვლიდით. ვერც ვიმუშავებდით. ამაზე შეგვიძლია მოსახლეობა დავამშვიდოთ, ნუ იქნებიან პანიკაში. ეს ასე არ დარჩება. სამუშაოები რომ დასრულდება, ჩვეულებრივ, პირვანდელ მდგომარეობაში იქნება ისევ, ამას გავიტანთ“,- აღნიშნა ირაკლი ბენდელიანმა.
როგორც თბილისის მერმა განაცხადა, ამ დროისთვის, ტერიტორიაზე უკვე მოწყობილია სამშენებლო მოედანი და ხორციელდება გეოლოგიური კვლევა.
„მტკვრის მარცხენა სანაპიროზე, სადაც გზა ჩამოიშალა, სამუშაოები მიმდინარეობს. პირველ რიგში, მომზადდა სამუშაო მოედანი. გარკვეულ პრობლემებს წარმოადგენს წყალუხვობა. გაზაფხულია და მტკვარი ადიდებულია, რაც გარკვეულწილად, აფერხებს სამუშაოებს. ამ დროისთვის, მიმდინარეობს გეოლოგიური კვლევები, თუ რა ტიპის ხიმინჯოვანი კედელი მოეწყოს. ჩვენთვის მნიშვნელოვანია, სწრაფად დავასრულოთ აღნიშნული სამუშაოები. შესაბამისად, სავალი გზის აღდგენა მაისის ბოლოსთვის დასრულდება და ავტომობილების გადაადგილება თავისუფალი იქნება. რაც შეეხება ხიმინჯოვანი კედლის მოწყობას, სამუშაოების დასრულება დამოკიდებულია წყლის დონეზე“, – განაცხადა კახა კალაძემ.
ცნობისთვის, თბილისის მერიის ცნობით, მტკვრის მარცხენა სანაპიროზე არსებულ გზის სავალი ნაწილის პირველ ზოლსა და საფეხმავლო ბილიკზე, დაახლოებით, 50-მეტრიან მონაკვეთში, ბზარები რამდენიმე დღის წინ დაფიქსირდა. დეფორმაცია განიცადა მდინარის ნაპირსამაგრმა კედელმაც.
როგორც დედაქალაქის მერიაში აცხადებენ, გარემოს ეროვნული სააგენტოსა და ლევან სამხარაულის სახელობის ექსპერტიზის ეროვნული ბიუროს სპეციალისტების მოსაზრებით, საგზაო მონაკვეთზე არსებული მდგომარეობა გამოწვეულია გრუნტში მიწისქვეშა და ზედაპირული წყლების ჩადინებით. ამასთან, გავლენა იქონია მტკვრის ზემოქმედებამ ნაპირდაცვის კონსტრუქციებზე და მიწისქვეშა წყლების დონის სეზონურმა მერყეობამ.
სამუშაოებს, რომლის ღირებულება ხუთ მლნ ლარს შეადგენს, თბილისი მერიის დაკვეთით, კომპანია „ბლექ სი გრუპი“ ახორციელებს.
