UFC-ის მსუბუქი წონის ჩემპიონი ილია თოფურია სოციალურ ქსელში მედიაში გავრცელებულ ინფორმაციას ეხმაურება, რომლის მიხედვითაც, ის ოჯახში ძალადობის საქმეზე სასამართლოში ჩვენების მისაცემად დაიბარეს.
ჩემპიონის თქმით, ეს ინფორმაცია სიმართლეს არ შეესაბამება.
“ყოველთვის მადლიერი ვიყავი მედიის მხრიდან მიღებული პატივისცემით. მედია წლების განმავლობაში ჩემი გზის მნიშვნელოვანი ნაწილი იყო და კვლავაც არის, თუმცა სამწუხაროდ, დიდი გულისტკივილით უნდა ვთქვა, რომ ამჟამად მედიაში ვხვდები ისეთი საკითხების გამო, რომელთაც სპორტთან არანაირი კავშირი არ აქვთ. მესმის, რომ საჯარო ფიგურად ყოფნა ნიშნავს იყო დაუცველი ყალბი ამბებისა და შეცდომაში შემყვანი, სენსაციაზე გათვლილი სათაურების წინაშე, რომლებიც მხოლოდ “კლიკების” მოსაპოვებლად იქმნება.
გუშინ ერთ-ერთმა მედიასაშუალებამ გამოაქვეყნა სტატია ყალბი სათაურით, რომლის მიხედვითაც მე, თითქოს, დაბარებული ვიყავი სასამართლოში ოჯახური ძალადობის საქმეზე ჩვენების მისაცემად. მოგვიანებით, მათ ეს სათაური შეცვალეს, რადგან სიმართლეს არ შეესაბამებოდა. მე არასდროს ვყოფილვარ სასამართლოში გამოძახებული მსგავსი მიზეზით, თუმცა, რა თქმა უნდა, მზად ვიქნები ამისთვის, თუ ოდესმე საჭირო გახდება. სასამართლო სისტემის წესიდან გამომდინარე, მე ვალდებული ვარ მივიდე სასამართლოში, თუმცა ეს ეხება მხოლოდ ოჯახურ და ადმინისტრაციულ საკითხს, რომელიც ჩემი ქალიშვილის, ესპანეთის ფარგლებს გარეთ მოგზაურობას უკავშირდება. მიუხედავად არაერთი მცდელობისა, უკვე ოთხი თვეა ვერ ვნახულობ ჩემს ქალიშვილს.
მე ვიღებ იმ ფასს, რაც საჯარო ცხოვრებას ახლავს, მაგრამ ეს არ ამართლებს დაუდასტურებელი, ცრუ ინფორმაციის გავრცელებას, ფაქტების დამახინჯებას ან არასრულწლოვანის საკითხების გამჟღავნებას. ეს ყველაფერი დაიწყო მას შემდეგ, რაც მე განქორწინების განაცხადი შევიტანე, ჩვენი დაშორების შემდეგ. მას შემდეგ, რაც უარი ვთქვი სრულიად არაგონივრული ფინანსური მოთხოვნების მიღებაზე, რამდენიმე კვირაში შეტანილ იქნა ძალადობის ბრალდებით საჩივარი, რითიც ადრე უკვე დამემუქრნენ და რომელიც ამჟამად სასამართლოს მიერ განიხილება.
მე კვლავ ვენდობი ღმერთს, სამართალს და ადამიანებს. ვიცი, რომ სიმართლე გაიმარჯვებს და რომ მალე შევძლებ დავიბრუნო ჩემი ცხოვრების ორი ყველაზე მნიშვნელოვანი რამიდან ერთ-ერთი ჩემი ვაჟის, ჰუგოს გვერდით ჩემი ქალიშვილი, ჯორჯინა.
მედიისგან იმავე პატივისცემასა და სიზუსტეს ვითხოვ, რაც უმეტესობა ყოველთვის იჩენდა ჩემ მიმართ, და იმას, რომ დაეყრდნონ მხოლოდ ფაქტებს, რადგან სიმართლეს მხოლოდ ერთი გზა აქვს.
ღმერთმა დაგლოცოთ” – წერს ილია თოფურია მიმართვაში, რომელიც 3 იანვარს გამოქვეყნდა.
