უზენაესმა სასამართლომ ბოდბეში მომხდარი ფემიციდის საქმეზე მსჯავრდებულს უვადო თავისუფლების აღკვეთა მიუსაჯა.
ფემიციდის მსხვერპლის შვილები კომპენსაციის სახით 10 ათას ლარს მიიღებენ.
ინფორმაციას განაჩენის შესახებ „უფლებები საქართველო“ ავრცელებს.
უზენაესმა სასამართლომ დაასრულა სიღნაღის მუნიციპალიტეტის სოფელ ქვემო ბოდბეში მომხდარი ფემიციდის საქმის განხილვა, რომელშიც „უფლებები საქართველო“ მოკლული ქალის არასრულწლოვანი შვილებისა და მშობლების ინტერესებს 2022 წლიდან იცავდა.
უზენაესი სასამართლოს სისხლის სამართლის საქმეთა პალატამ 2025 წლის 6 ივნისის განჩინებით ძალაში დატოვა ქვემდგომი სასამართლოების გადაწყვეტილებები, რომლებითაც მოძალადე კაცს უვადო თავისუფლების აღკვეთა მიესაჯა. აღნიშნული განჩინება საბოლოოა და გასაჩივრებას არ ექვემდებარება.
