78 წლის ასაკში კომპოზიტორი ენრი ლოლაშვილი გარდაიცვალა. აღნიშნული ინფორმაცია მისი ძმის, მსახიობ ჟანრი ლოლაშვილის ოფიციალურ ,,ფეისბუქ” გვერდზე გავრცელდა.
ენრი ლოლაშვილის პირველი საერთაშორისო წარმატება უკავშირდება ნანა ჯორჯაძის ფილმს „ჩემი ინგლისელი პაპა“. 1987 წელს ფილმმა კანის კინოფესტივალზე „ოქროს კამერა“ დაიმსახურა. განსაკუთრებულად აღინიშნა ფილმის მუსიკა და ქართველი კომპოზიტორი საფრანგეთში ახალ ფილმებზე სამუშაოდ მიიწვიეს.
ნანა ჯორჯაძის ფილმში ენრიმ პირველად ითანამშრომლა ძმასთან – ჟანრი ლოლაშვილთან, რომელიც ერთ-ერთ მთავარ გმირს განასახიერებდა.
1987–1991 წწ. კომპოზიტორი ცხოვრობდა და მოღვაწეობდა საფრანგეთში.
2000 წლიდან მოსკოვში მოღვაწეობდა. როგორც თავად ამბობდა, თანაბრად ცხოვრობდა სამ ქალაქში: პარიზი, მოსკოვი, თბილისი.
ენრი ლოლაშვილი იყო საქართველოს კინემატოგრაფისტთა კავშირის წევრი.
კომპოზიტორი ძირითადად მოღვაწეობდა ჯაზისა და კინოს სფეროში. მის მიერაა შექმნილი მუსიკა ფილმებისთვის: “ჭიდაობას რა უნდა” (1986, რეჟისორი მ. ჭიაურელი); “რობინზონიადა, ანუ ჩემი ინგლისელი პაპა” (1987, რეჟისორი ნ. ჯორჯაძე); “Нежный возраст” (2000, რეჟისორი ს. სოლოვიოვი); „ლიკვიდაცია“ (2007, რეჟისორის. ურსულიაკი); სერიალი “კარამაზოვები” (2009, რეჟისორი ი. მოროზოვი) და სხვა.
2019 წლის 4 ნოემბერს თბილისში, რუსთაველის თეატრში გაიმართა ენრი ლოლაშილის შემოქმედებითი საღამო, სახელწოდებით „ნოსტალგია“, რომელიც გია ყანჩელის ხსოვნას მიეძღვნა.
