აჭარის საზოგადოებრივი ჯანდაცვის ცენტრი სამწუხარო ინფორმაციას ავრცელებს.
„აჭარის საზოგადოებრივი ჯანდაცვის ცენტრი ღრმა მწუხარებას გამოთქვამს აკაკი ბერიძის გარდაცვალების გამო.
პროფესორ აკაკი ბერიძეს განსაკუთრებული წვლილი მიუძღვის ქართულ მედიცინაში. როგორც გამორჩეულ ქირურგს, მეცნიერ-მკვლევარსა და მედიცინის დარგში არაერთი ინოვაციის ავტორს, მასთან თანამშრომლობა უდიდესი პატივი იყო კოლეგებისთვის და სტუდენტებისთვის.
მისი სახელი უკავშირდება ქირურგიული სკოლის ჩამოყალიბება-განვითარებას აჭარაში, სამედიცინო განათლების ხელშეწყობასა და ოპერაციული მკურნალობის უნიკალური მეთოდების დანერგვას. იგი იყო ქართული და საერთაშორისო სამედიცინო საზოგადოების ღირსეული წარმომადგენელი, რომელმაც თავისი პროფესიული მოღვაწეობით მოიპოვა უდიდესი პატივისცემა.
ღრმა სამძიმარს ვუცხადებთ ოჯახს, კოლეგებს, მეგობრებსა და ყველა იმ ადამიანს, ვინც აკაკი ბერიძის გარდაცვალება გულთან ახლოს მიიტანა.
მისი მოღვაწეობა სამედიცინო სფეროში და უდიდესი ღვაწლი საზოგადოების წინაშე მარადიული იქნება“, – წერია გავრცელებულ ინფორმაციაში.
