“ჩემი ნამდვილი სახელი არის როდამი – მამამ ასე დამარქვა. სულ ვეჩხუბებოდი, რატომ დამარქვი-მეთქი, ბავშვობაში სულ მრცხვენოდა.
თვითონ ამბობდა, რომ ეს სახელი მაშინ ყველაზე ლამაზ ქალს – როდამ ამირეჯიბს ერქვა და მინდოდა, ჩემი შვილიც ასეთი ლამაზი ყოფილიყოო. სულ კომპლექსი მქონდა ამ სახელის, ბავშვები დამცინოდნენ და სხვადასხვანაირად მეძახდნენ.
პიროვნული მთლიანობა ამ სახელთან ვერასდროს დავამყარე. დაბადების მოწმობაში, პირადობის მოწმობაში, პასპორტში – ყველგან შევიცვალე სახელი, ასე რომ, მე ორი სახელი მქვია – როდამი და ია:, – ამბობდა მსახიობი ია ფარულავა გოგი გვახარიას საავტორო გადაცემაში „შვილი“.
