კიდევ ერთი ავტოსაგზაო შემთხვევა დასრულდა უმძიმესი შედეგით. დაღუპულია ახალგაზრდა ცოლ-ქმარი, ხოლო კლინიკაში იმყოფება მათი ორი შვილი. ტრაგედია სამი დღის წინ დატრიალდა. ახალციხიდან, სოფელ ვალედან დილით ადრე გავიდნენ ცოლ-ქმარი ხვიჩა და ანა დარბაიძეები შვილებთან ერთად ბათუმის მიმართულებით, თუმცა სამწუხაროდ, გზაში მომხდარ ავარიას ემსხვერპლნენ. როგორც ოჯახის ახლობელი ჩვენთან საუბარში ამბობს, ხვიჩა დარბაიძე ადგილზე დაიღუპა, ხოლო მისი მეუღლე დღეს დილით გარდაიცვალა. ანა კლინიკაში ორი დღე ებრძოდა სიკვდილს, რომელიც უგონო მდგომარეობაში შეიყვანეს, სამწუხაროდ, ექიმებმა მისი გადარჩენა ვეღარ შეძლეს. ახლა ექიმები მათი შვილების გადარჩენისთვის იბრძვიან.
“ხვიჩა და ანა, ჩემი მეგობრები იყვნენ. ოჯახებით ვმეგობრობთ და თავზარდამცემია ჩემთვის ეს ტრაგედია. ხვიჩა ბათუმში მუშაობდა ბოლო დროს, იქიდან ჩამოსულა სპეციალურად, რომ მეუღლე და შვილები დასასვენებლად წაეყვანა, მაგრამ იქამდე ვერ ჩააღწიეს. დილით 4 საათზე გასულან მანქანით ვალედან ბათუმის მიმართულებით, გზაში, ზესტაფონთან მოუხდათ ავარია, როგორც ვიცი მსუბუქი ავტომობილი, რომლის საჭესთან ხვიჩა იჯდა, სატვირთოს შეეჯახა და სამწუხაროდ ხვიჩა ადგილზე გარდაიცვალა. მძიმედ დაშავდა მანქანაში მყოფი მისი მეუღლე და შვილები. ანა უგონო მდგომარეობაში მყოფი გადაიყვანეს კლინიკაში, სამწუხაროდ ის გონზე მოუსვლელად დღეს დილით გარდაიცვალა.
სამი შვილი ჰყავთ და სამივე თან ჰყავდათ. ბიჭი და გოგონა დაშავდნენ. გოგონა შედარებით უკეთესად არის, ბიჭს თავის არეში აქვს დაზიანება და ოპერაცია გაუკეთდა, როგორც ვიცი, ისიც მძიმედაა და ყველანი ვლოცულობთ, რომ ბავშვები გადარჩნენ. რამ გამოიწვია ავარია, ამ დეტალებს სამართალდამცავები დაადგენენ. არის ვარაუდი, რომ ხვიჩას ჩაეძინა, იმ დროს ყველას ეძინა მანქანაში და ეს საშინელი ავარია მოხდა. ბავშვები კლინიკაში რჩებიან. ღმერთმა ქნას გადარჩეს ორივე.
ამბობენ მანქანა რამდენჯერმე ამოტრიალდა და სატვირთო მანქანას შეეჯახაო. ახალციხეში ამ კვირაში 9 ავარია მოხდა. ძალიან ძნელია როცა უყურებ როგორი ახალგაზრდები ეწირებიან ავტოსაგზაო შემთხვევებს. ვუსამძიმრებ მათ ოჯახის წევრებს. 4 საათზე გასულან სახლიდან, ახალციხიდან და 8 საათისკენ ეს საშინელი ამბავი იცოდა მთელმა ქალაქმა. ძალიან დიდი ტრაგედიაა”, – განუცხადა “კვირის პალიტრას” ოჯახის ახლობელმა.
წყარო: ,,კვირის პალიტრა”
