ჯგუფ „ურსას“ სოლისტი გიორგი ძოწენიძე სოციალურ ქსელში მიმართვას ავრცელებს, რომელსაც უცვლელად გთავაზობთ.
„მოგესალმებით მეგობრებო, გულშემატკივრებო და ჯანსაღი კრიტიკის მქონე ადამიანებო. მინდა, იმ გაურკვევლობასთან დაკავშირებით გავაკეთო განცხადება, სადაც თითქოს რაღაცების გასაყალბებლად მიზანმიმართულად გამოვიყენე ვიდეო, რომელიც სხვა დროს და სხვა ადგილას ყოფილა გადაღებული.
სინამდვილეში ასე იყო: კონცერტის დღეს, 22 ნოემბერს კონცერტის წინ ორგანიზატორს გამოუგზავნეს ეს ვიდეო. ბუნებრივია, მე არ ვიცოდი, ეს კადრები, როდის და სად იყო გადაღებული. ამას ვერც ვერსად გადავამოწმებდი.
იქიდან გამომდინარე, რომ ჩვენც და ორგანიზატორიც მიზანმიმართულად შეგვიყვანეს შეცდომაში, წავშალე ვიდეო და ამ კადრების გარეშე თავიდან დავდე. ფაქტი ისაა, რომ კონცერტი ემიგრანტებისთვის გერმანიაში ჩატარდა. ამის არაერთი მოწმეა და ტყუილი არც გვჭირდება. რომ ჩაშლილიყო ამასაც ვიტყოდით, ცხოვრებაში ყველაფერი ხდება და ასეთი უმნიშვნელო საკითხი ვთვლი, რომ საყურადღებო არაა. უამრავი კონცერტი გადადებულა და გაუქმებულა, რომც გაუქმებულიყო, არც ეს იქნებოდა ტრაგედია, სხვა დროს და სხვაგან ჩატარდებოდა.
სქრინს, სადაც ეს ვიდეოა გამოგზავნილი „მტკიცებულებად“ ვტვირთავ. პერსონალური მონაცემების დაცვის მიზნით არ ვაჩვენებ, ამ ადამიანის სახელს და გვარს. ვისაც შეთქმულების თეორიების სჯერა, დაე სჯეროდეს. ყველას თავისი არჩევანი აქვს“, – წერს ძოწენიძე.
