სომხეთში ნარკოდანაშაულთან დაკავშირებული ბრალდებით დააკავეს სომხური სამოციქულო ეკლესიის არქიეპისკოპოსი არშაკ ხაჩატურიანი, სასულიერო იერარქი, რომელიც სავარაუდოდ, სომხეთის ეკლესიასთან დაკავშირებულ სექს-სკანდალში ფიგურირებს. ინფორმაცია სასულიერო პირის დაკავებაზე სომხურ მედიაში ვრცელდება.
არშაკ ხაჩატურიანის ადვოკატმა არსენ ბაბაიანმა სოციალურ ქსელში დაწერა, რომ „ეროვნული უსაფრთხოების სამსახურმა არშაკ ხაჩატურიანი საგამოძიებო კომიტეტის შენობაში 4 დეკემბერს დააკავა“. ადვოკატი არსენ ბაბაიანი განმარტავს, რომ ხაჩატურიანს ედავებიან, რომ დისკრედიტაციის მიზნით, 2018 წელს ნარკოტიკული საშუალება „ჩაუდო“ აქტივისტს, რომელიც სომხეთის პატრიარქის, გარეგინ II-ის წინააღმდეგ გამოდიოდა.
“სისხლის სამართლის საქმე აღიძრა წინასწარი გამოძიების ფარგლებში, სომხეთის რესპუბლიკის სისხლის სამართლის კოდექსის 393-ე მუხლის მე-2 ნაწილის 1 და 4 პუნქტებით, რაც გულისხმობს ნარკოტიკებით უკანონო ვაჭრობას, ჩადენილს პირთა ჯგუფის მიერ წინასწარი შეთანხმებით და საჯარო ადგილას“, – განუცხადა სომხეთის საგამოძიებო კომიტეტმა Armenia Today-ს.
2025 წლის ოქტომბერში სომხურ სოციალურ ქსელებში გავრცელდა ინტიმური ხასიათის ვიდეოჩანაწერი, სადაც, სომხური მედიის ცნობით, სავარაუდოდ, სწორედ არშაკ ხაჩატურიანი ჩანს. კადრების გავრცელების შემდეგ გამოძიება დაიწყო „პირადი ცხოვრების ხელყოფის“ მუხლით. ხაჩატურიანი, რომელიც ფაშინიანის ღია მოწინააღმდეგეა, ცნობებს კადრებში მისი სავარაუდო იდენტიფიცირების შესახებ „უღირს ცილისწამებას“ უწოდებს.
წყარო: მთავარი
