პარასკევს, ჯანდაცვის მსოფლიო ორგანიზაციამ დაადასტურა, რომ ბანგლადეშში ქალი, რომელიც იანვარში სასიკვდილო ნიპას ვირუსით დაინფიცირდა, გარდაიცვალა.
dailymail-ი იუწყება, რომ პაციენტს, 40-50 წლის ქალს ჩრდილოეთ ბანგლადეშიდან, 21 იანვარს განუვითარდა სიცხე და ნევროლოგიური სიმპტომები, რომლებიც ნიპას ვირუსს შეესაბამება, მათ შორის თავის ტკივილი, მადის დაკარგვა და ღებინება.
მისი სიმპტომები შემდეგ გაუარესდა, დაბნეულობის ნიშნებით, გაძლიერებული ნერწყვდენით და კრუნჩხვებით – მდგომარეობა, რომლის დროსაც კუნთები სწრაფად იკუმშება და დუნდება, რაც იწვევს უკონტროლო კანკალს.
27 იანვარს, მან გონება დაკარგა და საავადმყოფოში გადაიყვანეს, სადაც მეორე დღეს გარდაიცვალა.
მედიის ცნობით, ეპიდემიოლოგიური მეთვალყურეობის ჯგუფმა აიღო ყელის ნაცხი და სისხლის ნიმუშები, რამაც დაადასტურა ნიპას ვირუსით ინფექცია.
ეს შემთხვევა ინდოეთში, ნიპას ვირუსის შემთხვევების აფეთქებას მოჰყვა, სადაც სასაზღვრო კონტროლი უკვე გამკაცრებულია.
ბრიტანეთის ჯანდაცვის ორგანოების ცნობით, ვირუსი იშვიათი, მაგრამ სერიოზული ინფექციური დაავადებაა, რომელიც ღამურებს გადააქვთ და შესაძლოა ინფიცირებულთა 75%-ი ფატალური შედეგით დასრულდეს. ამასთან, ჯანდაცვის მსოფლიო ორგანიზაცია აცხადებს, რომ ნიპას ვირუსის საერთაშორისო გავრცელების რისკი კვლავ დაბალი რჩება.
