25 წლისაც არ ვიყავი, როცა შემიყვარდა ქალი, რომელიც ჩემზე საკმაოდ უფროსი იყო, ქმარიც ჰყავდა და ორი შვილიც.
თავიდან მისმა თავისუფალმა ქცევამ მომხიბლა, მოგვიანებით გამომიტყდა, შვილივით შემოგხედე, რადგან 20 წელზე მეტის არ მეგონეო.
მოკლედ, ერთი ნახვით შემიყვარდა. თავიდან მეწინააღმდეგებოდა, მაგრამ გრძნობებმა იმძლავრა და საყვარლები გავხდით.
ქმრიან ქალთან შეხვედრები დიდ რისკს უკავშირდებოდა. იშვიათად ვხვდებოდით ერთმანეთს, მაგრამ ეს ისეთი გრძნობა იყო, ამისთვის ლოდინი ღირდა.
ჩემებმა გაიგეს, სხვისი ცოლი რომ მიყვარდა. დედას ძალიან შეეშინდა, მისი ქმარი მოგკლავსო, მითხრა. ჯერ მე მეხვეწა, თავი დამენებებინა, მერე ჩემს საყვარელს მიუვარდა, მაგრამ ვერაფერს გახდა.
ნანატრი დღე დადგა, ჩემი საყვარელი ქმარს გაშორდა, მაგრამ დაქორწინება ისევ ვერ შევძელით, რადგან მეუბნებოდა, თუ გაიგებს, მას ქორწინების დროსაც ვღალატობდი, ბავშვებს და მე ცარიელ ქვაზე დაგვტოვებს, არაფერს მოგვცემსო.
ამასობაში წლები გავიდა, 40 წელს გადავცილდი. მისმა ყოფილმა ქმარმა ოჯახი მეორედ შექმნა.
ამის შემდეგ სულ მქონდა იმედი, რომ ერთ ოჯახად ვიცხოვრებდით, მაგრამ ასე არ მოხდა.
3 წლის წინ მისი უფროსი ქალიშვილი გათხოვდა და ქმარმა რუსეთში წაიყვანა საცხოვრებლად. ბავშვი რომ გაუჩნდა, დედამისიც წავიდა და იქ დარჩა.
საბოლოოდ ისე გამოვიდა, რომ სხვისი ცოლის სიყვარულმა უცოლოდ დამტოვა. მისთვის უამრავი რამ მაქვს გაკეთებული და ყოველთვის მეგონა, ამას ჩვენი მომავლისთვის ვაკეთებდით.
ყველაფერი წყალში ჩაყრილი აღმოჩნდა. დედა მეუბნება, ხომ გაფრთხილებდი, რომ ეგ ქალი გაგაუბედურებსო.
კი, ნამდვილად მეუბნებოდა და მართალიც აღმოჩნდა. დედისთვის რომ დამეჯერებინა, ახლა ცოლიც მეყოლებოდა და შვილებიც. ჩემს დას უკვე შვილიშვილიც ჰყავს და შეიძლება პაპაც კი ვყოფილიყავი.
გთხოვთ მოიწონეთ, გააზიარეთ და დააკომენტარეთ სტატია..
